طلاق سندريلا

هذة الاحداث لا تمت للواقع بصلة و اى تشابه بين الاحداث و الشخصيات فهو من محض الصدفة.

مشهد داخلى فى قصر الامير بعد مرور شهرين على حفل الزواج الاسطورى .
يدخل الامير بعد يوم عمل مضنى يجد سندريلا و على وجهها علامات الحزن و دمعتها على خدها ياعينى.
الامير فى سره: ايه يا ربى النكد ده هو انا ناقص فى الشغل و البيت. و يقترب من سندريلا محاولا رسم علامات التعاطف على وجهه .
الامير: مالك يا حياتى (يارب تبقى حاجة هايفة ) فى سره.
سندريلا: ابدا مافيش و هى تمسح دموعها و لسان حالها يقول اتحايل عليا شوية وانا اقوللك.
الامير و هو بيتلككك: طيب يا شيخة خضتينى افتكرتك زعلانة و لا حاجة. احنا هناكل ايه النهاردة محاولا تغيير الموضوع.
سندريلا: هو هيستهبل و لا ايه ؟ طيب و الله لاقلبها ضلمة: بص بقى انا زهقت من امك و عمايلها.
الامير: الملكة الام ؟ مالها بس.
سندريلا: منعت الخدم انهم يساعدونى و لما سالتها ليه قالت لى هو انتى كان عندك خدم فى بيت ابوكى؟
الامير:حقيقى انت مكانش عندك .... هنا لاحظ الامير انه يتحدث مع نفسه بصوت عالى فاستدرك قائلا حقيقى معندهاش حق .
سندريلا: لو سمحت بقى روح قولها كده.
الامير: انا بس ..اصل.. ماشى بكرة بكرة انا هاتصرف . تعالى بقى دلوقتى ناكل لاحسن هاموت من الجوع يالا.
سندريلا: مافيش اكل.
الامير: ليه بس .
سندريلا: بقولك امك سحبت منى كل الخدم تقولى فين الاكل و هو انا كان مفروض اقف فى المطبخ يعنى و لا ايه.
هنا تدخل الملكة الام و هى تسال عن سبب الزعيق و الفضايح و الامير يحاول ان يخفى السبب الحقيقى منعا للمشاكل و لكن يبدو ان الملكة كانت واقفة ورا الباب و سامعة كل حاجة
الملكة الام: يعنى هى جت علينا ما انتى كنتى نازلة كنس و مسح فى بيت ابوكى مكنتيش قادرة تعملى اى حاجة لراجل يسند بيها طوله؟
الامير: مش مهم يا مامى انا هاطلب اى حاجة دليفرى دا انا حتى واحشنى اكل الشارع ( يا رب استر و عديها على خير) و يحاول سحب الست الوالدة خارج الغرفة.
سندريلا و علامات الدهشة على ووجهها: هو انت كنتى عاوزة عروسة لابنك و لا خدامة؟
الامير: يا حبى ده مامى بتهزر بس هزاز تقيل شوية .
الملكة : و هو انا لوكنت بادور على عروسة كنت مسكت فردة جزمة و مشيت ادور فى الشوارع على صاحبتها .
سندريلا: و هو انا كنت قلت لحد انزل دور عليا يعنى؟
الملكة: و هو فى واحدة تنسى جزمتها فى حتة برضه اكيد كنتى قاصدة.
الامير محاولا تلطيف الجو: يا مامى سندريلا كان لازم تمشى الساعة 12
الملكة: و النبى انت باين عليك اهبل دى تمثيلية كانت عاملاها علشان تخلص من الفقر و القرف اللى فى بيت ابوها بس على مين انا حاوريها النكد اللى على اصوله.
سندريلا بعد ان فاض بها: مولاى لو سمحت طلقنى طلقنى طلقنى.
و بعد هذة الليلة العظيمة فى تاريخ المملكة اختلفت الاقاويل حول مصير الامير البعض حكى انه طلق سندريلا و تزوج بنت خالته تفيدة بناء على تعليمات الملكة . و البعض الاخر يقول انه رفض الطلاق و خد سندريلا و طفش من المملكة بعد ما جاب عقد عمل فى الكويت. و اخرون يوكدون انه اصابته لوثة عقلية وا نه حاليا احد مجاذيب السيدة و ان سندريلا اتجوزت واحد من الناس و جابت دستة عيال و عاملة نصبة شاى على ناصية شارعهم و هى تنكر شخصيتها التى يتعرف عليها الناس عندما تبدا فاصل من الدعاء على الملكة الام كلما ذكرت امامها.