انا و انت و البلوج (3

المكان: يعنى هنروح فين ادينا متلائحين
الزمان: ساعة بدرى عن كل مرة
الاشخاص:نقدم لكم فى اول ظهور الطفل المعجزة: الواد الرزل

الواد الرزل: ماما ماما هو مين اقوى انا ولا القطة؟
انا: انت طبعا يا حبييبى
انت بعد اول رشفة من الماج الموجود امامك: ايه ده ايه البتاع ده؟
انا من وراء شاشة الكمبيوتر و باتسامة فخر: دا كا بتشينو بطعم الهازل نت.
انت: هازل ايه؟
انا مازالت متفائلة : يعنى بطعم البندق يا حياتى ايه رايك حكاية مش كده؟
انت:بندق ايه القهوة يعنى قهوة و بس ده اسمه عك
انا فى سرى ايش فههمك انت فى القهوة انت يا دوب عليك حلبة حصى
الواد الرزل : ماما ماما هو انا اقوى ولا الكلب؟
انا مستعيدة هدوء اعصابى: انت طبعا
الواد الرزل يستعرض عضلاته التى هى زى الفتلة و اتا ارد عليه باتسامة و احاول التركيز مرة اخرى
انا: بتحفز: يعنى ماسالتنيش عن البوست بتاع النهاردة؟
انت: ماهو انت بتقولى لوحدك
انا : اشمعنى يعنى بتعرف تسال طبخة لنا ايه؟
انت : ياريت تبقى فى المطبخ زى البلوج
انا: انت بتقارن بين البلوج و المطبخ يعنى الاكلة اللى اضيع فيها ساعات و سيادتك تزلطها فى ثوانى زى الخواطراللى بحط فيها عصارة روحى و خلاصة افكارى .
انت: ياريت تبقى تحطى شوية من الخلاصة دى المرة الجاية فى الخضار يمكن يتظبط شوية
الواد الرزل: ماما ماما هو مبن اقوى انا ولا الديناصور؟
انا:؟؟؟؟؟؟ هو الواد ده طالع اهبل لمين؟
انت: ؟؟؟؟؟؟؟؟؟؟؟؟؟