meaningless lines

Sunday, February 06, 2011

عصاية سيدنا سليمان

كما لم يعرف الجن ان سيدنا سليمان مات الا عندما اكلت عصاته لم يعرف المصريين ان النظام الحاكم هش و فارغ الا عندما قام بعض من الشباب باسقاط رموزه واحد تلو الاخر . و لان معظم الشعب و انا منهم فهمه بطىء زى الحكومة معلهش بقى من عاشر القوم و اربعين يوم و احنا معشرينهم بقالنا سنين و لان برضه الشعوب العربية و احنا منهم برضه تحكمها النزعة القبيلة و الاعراف و التقاليد و و الميل لقمع الاخرون ولما منلقيش حد يقمعنا احنا بنقمع نفسنا بنفسنا فاختلفت ردود الافعال حول ما حدث. اكيد زى ما الجن عملوا منهم من ادرك ان سيدنا سليمان مات و انه يمكنه الخروج من تحت سلطته ( مع اعتذارى الكامل لسيدنا سليمان ) و البعض الاخر فضل مش مصدق و شاكك فى الموضوع. و البعض اللى شاكك ده هو الشعب اللى متربى على كتب التربية الوطنية و الدراسات الاجتماعية و القناة الاولى و ده جاهل سياسيا و محتاج محو امية سياسية و محتاج دروس و علاج نفسى علشان يصدق انه حر يالا كده كلنا مع بعض حاء..... راء....ياء......تاء......حرية بس و النبى بلاش حد يقراها على طريقة عبدالفتاح القصرى ح ر ي ة مبارك.

مرسوم على الارض خط ابيض عريض بس بعرض القدم ماشى عليه الناس و القدم قدام القدم اوعى يا عم تدوس برة الخط لاحسن الارض تبلعك و الهمس ينقل خبر ورا الخبر واحد من هناك حط رجله و اتخطف و التانى فكر بس و الكرباج لف حواليه رجعه امشى امشى و اوعى تقف اوعى تبص حواليك و لا تبص تحت رجليك. بس الحقيقة انك لو خرجت عن الخط هتقف و الارض تحتك ثابتة و لو مشيت لبعيد هتوصل حتة اوسع و اجمل من اللى فى نهاية الخط الابيض و هكدا يفعل الطغاة مع شعوبهم حتى ياتى من يكشف الحقيقة

يبدو ان اجتماع مجلس الوزراء كان لعمل صلاة استسقاء و بما ان دول ناس بركة اهى مطرت و الازمة هتتحل بطل خراطيم الداخلية المطر هيغرق الميدان واللى مش هيمشى هيجيلوا التهاب رئوى ويفطس والمشكلة بس ان دلوقتى يطلع علينا واحد يقولك ان السماء مع مبارك و احدمن جانب التانى يقوللك قفشوا ملاك بيرش مياه ولما فتشوا طلع معاه كارنية مباحث امن دولة

اللى بيحصل فى مصر الان درس لاى حد بيدرس سياسة حيث ان كل انواع الممارسات السياسية موجودة على الساحة الان نضج سياسى تخلف سياسى عهر سياسى تخبط سياسى بلطجة سياسية و غباء سياسى هل من مزيد